«Məscidin həyətində və küçənin ortasında namaz qılıb ibadət etmək düzgün deyil». Bu haqda daxili işlər nazirinin müavini Oruc Zalov bu gün jurnalistlərə verdiyi açıqlamasında bəyan edib. Onun sözlərinə görə, belə yerlərdə ibadət etmək şəhər sakinlərinin narahatlığına səbəb olur. «Şəhidlər Xiyabanına qonaqlar gəlir, yolun ətrafında isə namaza gələnlərin avtomobilləri maneə yaradır. Namaz məsciddə qılınmalıdır. O ki qaldı dini icmaların fəaliyyətinə, qeydiyyatı olan bütün icmalar rahat fəaliyyət göstərə bilərlər. Bununla bağlı tərəfimizdən heç bir problem yoxdur».

O. Zalov polis idarələrində dindarların saqqalının qırxılması ilə bağlı yayılan məlumatlara da aydınlıq gətirib: «Polis bölmələrinin əməkdaşları üzqırxma işləri ilə məşğul olmur. Onların işləri gücləri yoxdur, məgər? Bunlar şayiədən başqa bir şey deyil. O ki, terrorla bağlı gəzən söz-söhbətlərə Azərbaycanda hər hansı bir iğtişaşı törətmək üçün xüsusi qüvvəyə malik mərkəz yoxdur. Hər şey nəzarət altındadır».

Gülnaz Qənbərli