 Təqsirləndirilənlərə qarşı Cinayət Məcəlləsinin 332.2.2 və 332.2.3 maddələri ilə ittiham irəli sürülüb.
Bu gün Bakı Hərbi Məhkəməsində hakim Salman Hüseynovun sədrliyi ilə Müdafiə Nazirliyinin Ələtdə yerləşən hərbi hospitalında baş vermiş «dedovşina» faktı ilə bağlı təqsirləndirilən keçmiş əsgərlərin məhkəmə baxışı başlayıb.
ANS PRESS-in məlumatına görə, dövlət ittihamçısı Toğrul Hüseynov ittiham aktını elan edib. Akta görə, təqsirləndirilənlər Famil Qəniyev, Cavid Yusibov, Ramiz Cəfərov, Elxan Məmmədov və Adil Abbasov 2008-ci ilin fevral ayının sonlarında müalicə edildikləri hospitalda, ətraf palataların əsgərlərini öz otaqlarına çağıraraq, əylənmək məqsədi ilə onları bir-birlərini döyməyə məcbur ediblər. Onlar palatalardan 6 nəfər çağırıblar və bildiriblər ki, qalib gələn şəxs, onlarla birgə qalacaq.
Təqsirləndirilənlərə qarşı Cinayət Məcəlləsinin 332.2.2 və 332.2.3 maddələri ilə (Tabelik münasibətlərində olmayan hərbi qulluqçuların arasında qarşılıqlı münasibətlərin nizamnamə qaydalarını pozma) ittiham irəli sürülüb. Təqsirləndirilənlər özlərini tam təqsirli biliblər. Onlardan bəzilərinin ifadələrinin qərəzli olduğunu nəzərə alan hakim təqsirləndirilənlərin istintaqdakı ifadələrini elan edib.
Prosesdə zərərçəkmiş Əli Cəfərov, Mahmud Məmmədov da ifadə verib.
Daha sonra prosesdə hadisə baş verən baxt hospitalda bölmə rəisi işləmiş polkovnik leytenant Oktay Babayev dindirilib. Qeyd edək ki, ona qarşı Famil Qəniyevi qanunsuz olaraq hospitaldan evə buraxdığı üçün Cinayət Məcəlləsinin 341-ci maddəsi ilə ayrıca itiham irəli sürülüb. Məhkəmədə ifadə verən O. Babayev bildirib ki, həmin vaxt Familin yeni doğulan uşağı ölüb. Bunun üçün də onu evə buraxıb. «Bunun qanunsuz olduğunu bilirdim. Sadəcə mərhəmət hissi mənə qalib gəldi», deyə o ifadəsində bildirib. Məhkəmə işini davam etdirəcək. /ANS PRESS/
|
