Son məlumatlara görə, Gürcüstan Silahlı Qüvvələri Tsxinvaliyə bütün perimetrlər üzrə nəzarət edir. Şəhərin bütün strateji obyektləri Tiflisin nəzarəti altındadır. Lakin Tsxinvalidə yenə atəş səsləri eşidilir. Separatçılar şəhər kənarındlakı meşələrdən atəş açır. Gürcüstan tərəfi, Rusiya Hərbi Hava Qüvvələrinə məxsus daha bir hərbi təyyarənin vurulduğunu bildirir.
Rusiya televiziyaları isə ictimaiyyəti çaşdırmaq məqsədilə yalan məlumatlar yaymaqda davam edir. Rusiyanın «Birinci kanalı»nın «Vremya» proqramında Gürcüstan Silahlı Qüvvələrinin Tsxinvalini tərk etməsi barədə məlumat verilib. Müxbir, veriliş zamanı canlı bağlantıda bildirib ki, Rusiya qoşunları Tsxinvali ətrafındakı yüksəkliklərə nəzarəti ələ keçirib və bundan sonra gürcü əsgərlər şəhəri tərk edərək, Qoriyə qədər geri çəkilib.
Cənubi Osetiya separatçılarının lideri Eduard Kokoytı «İnterfaks»a müsahibəsində deyib ki, Gürcüstan Silahlı Qüvvələrinin keçirdiyi əməliyyat zamanı 1400-dən artıq adam ölüb. O, baş verənləri Tiflisin Cənubi Osetiyaya qarşı üçüncü soyqırımı adlandırıb. Separatçı liderin fikrincə, son faciəli hadisələr Cənubi Osetiyanın müstəqilliyinin tanınması istiqamətində son addım olacaq. /ANS PRESS/