Qahirədə İslam məsələləri üzrə Ali Şuranın "İslam ideyasının modernləşdirilməsi" mövzusunda XXI beynəlxalq İslam konfransı öz işinə başlayıb. Dörd gün davam edəcək konfransda  İslam Konfransı Təşkilatının baş katibi Ekmələddin İhsanoğlu,  İSESKO-nun  baş katibi Əbdüləziz bin Osman Əl-Tüveycri  və Misir prezidenti Hüsnü Mübarəyin adından  baş nazir Əhməd Nazif  çıxış edib. 

Konfransda Azərbaycanı Qafqaz Müsəlmanları İdarəsinin  sədri Şeyxülislam Hacı Allahşükür Paşazadənin başçılıq etdiyi nümayəndə heyəti  təmsil edir.  Hacı Allahşükür Paşazadə çıxışında  bir çox müsəlman xalqlarının zamanla ayaqlaşmaq üçün müasirləşməyə ehtiyacı olduğunu qeyd edərək, İslam fikrinin, müsəlman düşüncə tərzinin modernləşdirilməsindən  bəhs edib. Şeyxülislam həmçinin öz çıxışında Dağlıq Qarabağ münaqişəsinə toxunaraq, münaqişənin tarixi və səbəbləri barədə konfrans iştirakçılarına geniş məlumat verib:

“Əsas məsələlər  şəriət məsələlərinə yenilik  gətirməkdir. Ümümən İslam  aləmi arasında əlaqələr barədə söhbətlər gedirdi. Mənim də İslamda qloballaşma  haqqında çıxışım var idi. Bu çıxışda mən həm Azərbacan dövlətində olan  tolerantlıq, dinlərarası  dialoq, vicdan azadlığı haqqında məlumat verdim. Bizim  ən yaralı  yermiz olan Qarabağ məsələsi, Ermənistanın  Azərbaycana  olan təcavüzünün davam etməsi haqqında da  konfrans  iştirakçılarına  məlumat verdim”./ANS TV/